LADIKTÉ KRÉYÒL 1997

Sa ladikté a fèt Rémirmonjoli mèrkrédi 29 òktòb 1997. A roun palòmarké yé pran annan oun pyès téyat di Élie STEPHENSON : O Mayouri ; d'ÉLIE STEPHENSON, sous la direction de Marguerite FAUQUENOY. ; PARIS, L'Harmattan, 1988, pp. 38-40.

Pannan roun lasimenn, lasosyasyon A.P.E.C.L.A.R., G.E.R.EC. ké RAKABA bay kour marké kréyòl. Jou ladikté-a, chak moun yan té gen roun papyé ké fason-an yé ka marké kréyòl-a.
 

-Lavi-a chanjé, a pou di, lavi-a chanjé ! Di mo tan, a pa té konran. Kan to k'alé a dégra Kayenn, jodla, i pa gen légim, oun kilo kwak ka kouté konbyen soumaké ! Di mo tan, kan mo té jenn, mo rounso té ka wè oun ta kroukrou kwak ; dachin, yanm, tayòv, tousa té ka fè chyen..

Palò Frédérik

-Mo dakò ké tousa..., mé gadé moso : kouman zòt lé jenn-yan rété annan komin-an ? Sa yé ka planté pé ké fè yé viv.

Gadé travay i gen pou fè san kilo kwak, plis traka to ka wè pou voyé li Kayenn !

To pa gen traktèr, to pa gen pyès machin, to ka travay ké oun sab, ké oun rou, ké to dé lanmen Bondjé bay to a.

Mé ponmtè-a, douri-a ki ka vini di ròt péy-a, pi bon marché ki prodwi péy-a to ka vandé a. Sa ki ka pasé ? Moun-yan miyò achté prodwi ròt péy-a ; plis moun-yan ka achté ponmtè, mwens to ka vandé kwak é plis to blijé vandé li chè. Mé koté bèt-a pa k'alé, mé a la i gen oun problenm !

Palò Sonson

-Tousa a bèl paròl, a pa sa ki ka chanjé angnen, to 'a bo di sa to lé, travay latè pa gen profi ankò ; to ka fè ounlo gran fraz, pas to soti annan gran péy.